تارت الخوخ

المقادير

كوب دقيق
2 صفار بيض
½ كوب زبدة طرية
ملعقة كبيرة سكر بودرة

لعمل الحشو

3/4 كوب زبدة
1/4 كوب دقيق
3 ثمرات خوخ
2 بيضة مضروبين
1/2كوب سكر بودرة
3/4 كوب لوز مطحون
كمبوت خوخ أو مربى مشمش

الطريقة

لعمل العجين امزجي الدقيق والزبدة مع بعض وافركيهم لحد ما يشكلوا زي البقسماط المطحون

 اخلطي معاهم السكر وصفار بيضة واحدة، وملعقة صغيرة ماء وامزجيهم شوية

 حطي الصفار التاني وملعقة ماء تاني لحد ما العجينة تتماسك وحطيها في كيس بلاستيك وحطيها في الثلاجة 30 دقيقة

 بعد كدة افردي العجينة على سطح مرشوش بالدقيق، لحد ما توصل للحجم اللي إنتِ عايزاه

حطي العجينة في القالب، وحطي عليها ورقة زبدة، وفوقها حاجة تقيلة علشان ما تتنفخش، وحطيها في الفرن لمدة 10 دقائق

 طلعيها من الفرن واختبريها بالشوكة ودخليها الفرن تاني من غير ما تحطي حاجة تقيلة، لمدة 10- 15 دقيقة لحد ما تبقى هشّة زي البسكويت

 وإنتِ حاطة الصينية في الفرن جهزي الحشو: اضربي السكر مع الزبدة لحد ما تبقى كريمة

 حطي معاهم البيض واضربيهم، وبعدين حطي الدقيق واللوز المطحون، وخدي منها بالملعقة وحطي فوق القالب
رصي عليهم الخوخ، وحطيها في الفرن لمدة 30- 40 دقيقة لحد ما تبقى دهبي
بعد ما تطلعيها من الفرن وتبرد حطي عليها المربى أو شربات الخوخ بعد ما تسلقيه وبالهنا والشفا